Гугл и Јутјуб убедливо на врвот, Четџипити меѓу петте најпосетувани платформи во светот

„Гугл“ и „Јутјуб“ и натаму се најпосетуваните интернет-платформи во светот, но сè поголемата популарност на алатките за вештачка интелигенција ја менува сликата на интернетот. Според анализата на „Вижуал Капиталист“, заснована врз податоците на „Семраш“ за септември 2026 година, „Четџипити“ се искачи на четвртото место на листата.

— реклама —

„Гугл“ остварил 108,9 милијарди посети, а „Јутјуб“ речиси 60 милијарди. Двете платформи, кои се дел од „Алфабет“, заедно достигнале 168,9 милијарди посети. На третото место е „Фејсбук“ со 12,21 милијарди, додека „Четџипити“ забележал 8,23 милијарди посети, оставајќи ги зад себе „Инстаграм“, „Редит“ и „ТикТок“.

„Инстаграм“ имал 6,81 милијарди посети, „Редит“ 4,82 милијарди, „Ватсап“ 4,26 милијарди, а „Икс“ 4,17 милијарди. „Википедија“ забележала 3,8 милијарди, додека „ТикТок“ имал 2,71 милијарди посети.

— реклама —

Податоците ја покажуваат и големата предност на „Гугл“ пред останатите интернет-пребарувачи. „Бинг“ остварил 2,33 милијарди посети, а „ДакДакГоу“ околу 2,2 милијарди. Трите платформи на „Мета“ – „Фејсбук“, „Инстаграм“ и „Ватсап“ – заедно достигнале 23,3 милијарди посети.

— реклама —

Меѓу платформите за вештачка интелигенција, „Четџипити“ има значителна предност пред конкурентите. „Клод“ се наоѓа на 21. место со 1,6 милијарди посети, приближно петпати помалку од „Четџипити“.

На листата се најдоа и „Амазон“ со 2,32 милијарди посети и „Јаху“ со 2,3 милијарди, како и страници за возрасни, меѓу кои „Порнхаб“ со 3,4 милијарди и „ИксВидеос“ со 2,27 милијарди посети.

— реклама —

Анализата опфаќа 40 најпосетувани веб-страници, а во пресметките се вклучени посетите од компјутери и мобилни уреди, вклучително и повеќекратните посети од исти корисници.