Хаос во Парагвај: 10 репрезентативци заглавија речиси 10 милиони евра во пропадната банка

Кризата во Парагвај ги погоди и некои од најдобрите фудбалери на оваа јужноамериканска земја. Како и милиони граѓани, и репрезентативците се соочуваат со голема неизвесност околу враќањето на своите пари по финансискиот колапс на банката „Уено“.

Кризата предизвика сериозни последици за милиони луѓе, откако банката „Уено“, во која своите депозити и средства ги чувале околу три милиони граѓани, односно приближно 60 отсто од полнолетното население, се најде во финансиски колапс. Во банката се наоѓал и значителен дел од средствата на државните и пензиските фондови.

Голем број граѓани преку ноќ останаа без пристап до своите пари, што предизвика масовни протести во главниот град Асунсион.

Претседателот на Парагвај, Сантијаго Пења, кој претходно бил поврзуван како акционер со групата што ја контролирала банката, се соочи со истрага и обвинувања за судир на интереси, злоупотреба на службената положба и префрлање јавни средства.

Во банката значителни суми пари имале депонирано и фудбалските репрезентативци на Парагвај. Според информациите на локалните медиуми, десетмина членови на националниот тим заедно чувале речиси 10 милиони евра во оваа финансиска институција, а сега не можат да ги повлечат средствата.

— реклама —

Банката „Уено“, инаку, беше спонзор на голем број значајни спортски организации во Парагвај, меѓу кои и Фудбалската федерација на земјата.

Адвокатот Родриго Кодас, кој ги застапува десеттемина репрезентативци, најави дека ќе разговара со нив и за можноста за бојкот на настапите за националниот тим.

Во меѓувреме, клубовите чии средства исто така се заглавени во банката ги преиспитуваат своите договори и финансиските планови.

Поранешниот извршен директор на банката, бизнисменот Федерико Мигел Васкес Виљасанти, често бил присутен зад сцената на парагвајската репрезентација. Според адвокатот Кодас, токму неговата блискост со националниот тим и пристапот до фудбалерите влијаеле врз одлуката на некои од нив да ги вложат своите пари во банката.

Васкес беше уапсен минатата недела во рамките на истрагата за пропаѓањето на финансиската институција.

— реклама —

„Беше присутен на секој натпревар, поминуваше време со играчите и патуваше со нив. Практично, беше уште еден член на групата. Тоа беше необично. Потоа се случи следново: самиот претседател на банката им пристапуваше на фудбалерите и им велеше: Морате да вложите пари во банката. Морате да ги префрлите вашите средства кај мене“, изјави адвокатот Родриго Кодас.

Адвокатот не ја исклучува ниту можноста за покренување правна постапка против владата на Парагвај доколку штетата не им биде надоместена на фудбалерите.

Тој размислува и за разговор со играчите околу можноста да престанат да настапуваат за репрезентацијата сè додека проблемот не биде решен.

Според информациите на радиото „ABC Color“, договорот меѓу банката „Уено“ и Парагвајската фудбалска федерација бил вреден околу 12 милиони долари за период од четири години, односно до август следната година.

— реклама —

Договорот опфаќал спонзорство на националниот тим, како и промоција на брендот за време на домашните фудбалски натпреварувања.

Иако официјално започнала со работа како банка дури кон крајот на 2023 година, „Уено“ за кратко време изградила значително присуство во парагвајскиот спорт.

Оваа финансиска институција беше главен спонзор на Парагвајската фудбалска федерација и Олимпискиот комитет на Парагвај, а имаше комерцијални договори и со некои од најголемите клубови во земјата, меѓу кои Олимпија и Серо Портено.

Фудбалерите на овие два клуба, но и на Гуарани, Спортиво Лукено и Рубио Њу, ги примале своите плати на сметки во банката. Сега и тие средства се недостапни.

Клубовите ќе мора да го променат начинот на кој ги исплаќаат платите и да ги преиспитаат планираните инвестиции.

— реклама —

Кризата ги погоди и останатите спортисти кои настапуваат во најсилната парагвајска лига.

„Очигледно е дека сите се сериозно погодени, бидејќи ова директно влијаеше врз нивните заштеди и плати. Фудбалерите имаат среќа што заработуваат добро, но нивните кариери се многу кратки и брзо одат во пензија. Затоа, кога ќе им го одземете она што го заработувале, тоа е навистина тежок удар“, изјави тренерот на Олимпија, Пабло Санчес.

Постои стравување дека клубовите во наредните месеци нема да можат редовно да ги исплаќаат платите на фудбалерите и вработените, бидејќи голем дел од нивните финансии биле поврзани со оваа банка.

Парагвајската фудбалска федерација, во соработка со организациите што ги застапуваат играчите, собира податоци за сите кои претрпеле штета.

„Станува збор за околу 400 фудбалери. Парагвајскиот фудбал е исклучително погоден, бидејќи оваа банка имаше огромно влијание врз целата спортска сцена. Беше како октопод со пипалата насекаде, впивајќи сè околу себе. Спроведуваме попис за да ја утврдиме вкупната штета и работиме на колективно враќање на платите на сите парагвајски фудбалери“, изјави Рохелио Делгадо, претседателот на синдикатот на фудбалери.