Холивудската актерка Хејден Панетиере, позната по улогите во сериите „Херои“ и „Нешвил“, почина на 36-годишна возраст. Полицијата соопшти дека првичната истрага не покажала знаци на насилна смрт или други сомнителни околности.
Полициски и медицински екипи вчера попладне биле повикани во станбен комплекс во Гринвил, Јужна Каролина, откако познаник на актерката пријавил дека таа не давала знаци на живот.
По пристигнувањето, екипите се обиделе да ја реанимираат, но Панетиере била прогласена за мртва на местото на настанот.
Полицијата во Гринвил и канцеларијата на окружниот мртовечник ја истражуваат смртта. Според нивните првични наоди, нема индиции за насилство, ниту пак околностите се оценети како сомнителни. Причината за смртта засега не е објавена.
„На 16 август 2026 година, околу 13:51 часот, службеници на полициската управа во Гринвил, заедно со итната медицинска помош, реагирале на пријава за жена која не давала знаци на живот во комплексот Judson Mill Lofts“, соопшти полицијата.
Во официјалното соопштение се наведува дека по пристигнувањето ѝ била укажана медицинска помош, но подоцна било констатирано дека станува збор за Хејден Панетиере и била прогласена за мртва.
Според „Дејли мејл“, актерката и нејзиниот партнер, агентот за недвижности Брајан Хикерсон, со кого имала турбулентна врска, ден пред нејзината смрт пристигнале од Лос Анџелес во Јужна Каролина.
Полицијата засега не соопштува дополнителни детали за случајот, а се очекуваат и резултатите од понатамошната истрага и утврдувањето на причината за смртта.
