На конкретни активности, инвестиции и регионална соработка треба да се насочи следната фаза од спроведувањето на Зелената агенда за Западен Балкан, порача министерот за животна средина и просторно планирање Муамет Хоџа од Жабљак, Црна Гора.
Хоџа учествува на Третиот министерски состанок за Зелената агенда за Западен Балкан, кој се одржува на 18 и 19 септември во рамките на црногорското претседавање со Берлинскиот процес за 2026 година.
На главната сесија „Зелена агенда за Западен Балкан – од заложби кон реализација“, Хоџа ја потврди посветеноста на Македонија кон Зелената агенда и европската интеграција, нагласувајќи дека во наредниот период приоритет треба да има спроведувањето на преземените обврски.
„Зелената агенда треба сè повеќе да стане платформа за регионална имплементација, а не само за регионален дијалог. Загадувањето не застанува на границите, а климатските ризици се заеднички“, порача Хоџа.
Тој ја нагласи потребата од заеднички решенија, размена на знаење и податоци, усогласување на стандардите и развој на регионална инфраструктура онаму каде што тоа е оправдано.
„Успехот нема да се мери според бројот на усвоени документи. Ќе се мери според конкретните промени што носат бенефит за граѓаните од целиот регион“, истакна Хоџа.
Како клучни приоритети на Македонија во наредниот период, министерот ги посочи забрзувањето на инвестициите во обновливи извори на енергија и енергетската ефикасност, зајакнувањето на климатското управување и подготовката за европската климатска рамка.
Меѓу приоритетите се и праведната транзиција за регионите зависни од јаглен, забрзувањето на реформите во управувањето со отпадот и циркуларната економија, како и унапредувањето на климатската адаптација, заштитата на природата и биолошката разновидност.
Третиот министерски состанок претставува можност за согледување на досегашниот напредок и утврдување на политичките насоки за следната фаза од спроведувањето на Зелената агенда за Западен Балкан.
Во рамките на состанокот во Црна Гора е предвидено усвојување на Министерската декларација за Зелената агенда за 2026 година, како и обезбедување политичка поддршка за клучните чекори на регионално ниво.
