Хрватска испраќа два канадера во Босна и Херцеговина за помош во гаснењето на пожарот што и понатаму се шири на планината Чврсница, во близина на Јабланица. Одлуката за испраќање на авионите ја одобри хрватската Влада на денешната телефонска седница.
Во акцијата ќе учествуваат два авиона „Канадер CL-415“ на Хрватското воено воздухопловство, со две екипажи од припадници на хрватските вооружени сили. Одобрено е и нивното преминување на хрватската граница со цел обезбедување хуманитарна помош за БиХ.
Помошта од Хрватска била побарана поради пожарот на планината Чврсница, на локалитетот Развале, на надморска височина од околу 1.890 метри. Пожарот и денес е активен, а поради исклучително непристапниот терен во моментов не може да се гасне со копнени сили, соопшти Цивилната заштита на Херцеговско-неретванскиот кантон.
Во гаснењето се ангажирани расположливите пожарникарски сили од Јабланица и од соседните градови и општини. Од воздух веќе дејствувале авионот „Ер трактор“ и хеликоптерот на вооружените сили на Босна и Херцеговина.
Според податоците што ги пренесува Н1 БиХ, „Ер тракторот“ извршил десет налети, а хеликоптерот 17. Бидејќи пожарот продолжува да се шири, побарана е меѓународна помош и ангажирање на два канадера од Хрватска.
Хрватските канадери и на почетокот на септември помагаа во гаснењето големи пожари во БиХ. Тогаш двата авиона дејствувале во подрачјето на Прозор-Рама, каде што заедно со пожарникарите успеале да го запрат ширењето на огнот кон населените места.
