Хрватска предлага да испрати до 200 војници и два хеликоптера во Косово

Хрватската влада предлага продолжување на учеството на своите вооружени сили во меѓународната мисија на КФОР во Косово, со испраќање до 200 војници и најмногу два хеликоптера на хрватските воздухопловни сили.

Предлог-одлуките за учество на хрватската војска во повеќе меѓународни операции и активности во странство беа усвоени на денешната владина седница и ќе бидат доставени до хрватскиот парламент.

— реклама —

Премиерот Андреј Пленковиќ оцени дека Хрватска повторно покажува дека е придонесувач за безбедноста, како во мисиите на НАТО, така и во операциите на Европската Унија. Според државниот секретар во Министерството за одбрана, Драго Матановиќ, хрватската војска моментално учествува во осум мисии – четири на НАТО, две на ОН и две на ЕУ, со вкупно 367 припадници.

— реклама —

Покрај учеството во КФОР во Косово, Загреб предлага испраќање војници и во мултинационалните борбени групи на НАТО во Полска, Литванија и Унгарија. Во Полска би биле распоредени до 170 припадници со пешадиски борбени возила, во Литванија до 120, вклучувајќи баталјон со хаубици, а во Унгарија до 220 војници.

Од хрватската влада наведуваат дека учеството во овие активности ќе придонесе за развој на воените способности, подобра соработка со вооружените сили на сојузничките земји и зајакнување на колективната одбрана.

— реклама —

За Хрватска, мисијата на КФОР има особено значење поради близината на Косово, бидејќи евентуалното влошување на безбедносната состојба би можело да влијае врз стабилноста на Југоисточна Европа, вклучително и врз Хрватска.

— реклама —

Хрватскиот контингент во Косово извршува повеќе задачи, меѓу кои патролирање, поддршка на локалните и меѓународните организации, одржување подготвеност за брзо распоредување во областа на Регионалната команда Запад и обезбедување на манастирот Високи Дечани и кампот „Вилаџо Италија“.

Неговите активности опфаќаат и воздушен транспорт, работа во командните структури на КФОР и советодавна поддршка на НАТО на ниво на Министерството за одбрана во Косово и косовските безбедносни сили.