Хрватски психијатар за смртта на Периш: Во 21 век сè повеќе ни недостига здрав разум

Смртта на 32-годишниот Кристијан Јосип Периш во Психијатриската клиника „Свети Иван“ во Јанкомир, Хрватска, предизвика бројни реакции и повторно го отвори прашањето за безбедноста на пациентите во психијатриските установи.

Здравствениот инспекторат утврдил сериозни неправилности во примената на мерките за физичко ограничување и водењето на медицинската документација, по што раководството на болницата поднело оставки. Четворица медицински техничари се во истражен притвор поради сомнение за тешко убиство, а не е исклучено истрагата да биде проширена.

За случајот и проблемите во психијатриската здравствена заштита во емисијата „Студио 4“ на ХРТ зборуваше психијатарот и универзитетски професор Вељко Ѓорѓевиќ, кој со години се залага за намалување на стигматизацијата на лицата со психички нарушувања.

— реклама —

Тој не ја криеше згрозеноста од снимките на кои се гледа постапувањето кон Периш.

„Како лекар се чувствувам бедно, како психијатар уште победно, а како човек сум згрозен. Со години предупредувам дека како општество сме се обезличиле и дека во 21 век, кој го нарекуваме век на умот, сè повеќе ни недостига здрав разум“, изјави Ѓорѓевиќ.

— реклама —

Психијатарот потсети дека Хрватска некогаш била меѓу водечките земји во развојот на вонболничката психијатриска грижа, но овој пристап постепено бил запоставен. Тој наведе дека порано во сите здравствени домови имало психијатри и психолози, додека со текот на годините социјалната психијатрија речиси исчезнала.

Според него, трагичната смрт на младиот пациент мора да биде поттик за конкретни промени, а не само повод за јавни реакции и описи на состојбата.

„Психијатриските пациенти можат да бидат агресивни, параноични, под дејство на алкохол или во психотична состојба, но без оглед на нивното однесување, секогаш мора да бидеме свесни дека тие се наши пациенти, а ние сме терапевти должни да се грижиме за нив“, нагласи тој.

— реклама —

Ѓорѓевиќ истакна дека успешното лекување не може да се сведе само на лекови и физичко ограничување, туку мора да се заснова на комуникација, доверба и односот меѓу пациентот и терапевтот. Тој предупреди и дека е неопходен постојан надзор врз работата на медицинскиот персонал и доследно почитување на пропишаните протоколи.

Посебно ја нагласи важноста од соодветна обука на вработените во психијатриските одделенија, посочувајќи дека покрај стручноста, за оваа работа е неопходна и емпатија.

— реклама —

Тој очекува трагедијата во Јанкомир да предизвика сериозно преиспитување на работата на здравствените установи, контролата, обуката и стручниот надзор над вработените.

„Установите мора да бидат под надзор, од врвот надолу. Здравствениот систем не можеме да го разгледуваме одвоено од социјалната заштита, образованието и медиумите. Имаме многу проблеми, а заостануваме во превенцијата и едукацијата“, предупреди Ѓорѓевиќ.

Тој заклучи дека за подобрување на психијатриската грижа се потребни поголеми вложувања во практичната обука, постојаното стручно усовршување, надзорот и размената на искуства со други земји.