Во окупираниот украински град Олешки и натаму живеат меѓу 1.500 и 4.000 жители, кои со месеци се отсечени од светот и се соочуваат со недостиг од струја, вода, лекови и редовно снабдување со храна, објавуваат „Билд“ и „Дојче веле“.
Пред почетокот на војната во градот живееле околу 24.000 луѓе, а денес преостанатото население, според украински извори, се наоѓа во исклучително тешки услови. Приближувањето на зимата дополнително ја влошува хуманитарната состојба.
Олешки се наоѓа јужно од реката Днепар, на само четири километри од Херсон, а според украинските власти, руските сили го претвориле градот во речиси целосно изолирана зона од која е многу тешко да се избега.
Според достапните информации, градот и пристапните патишта се минирани, додека мостот Антонивка, кој го поврзуваше Олешки со Херсон, беше урнат уште во ноември 2022 година. Украински извори наведуваат дека последната испорака на храна пристигнала на 26 мај, по што снабдувањето било целосно прекинато.
Поради немањето електрична енергија, жителите се принудени да готват на отворен оган. Недостигот од храна и основни средства за живот, според сведоштвата, довел до очајничка борба за преживување, при што луѓето крадат едни од други и колат сопствени животни бидејќи повеќе немаат со што да ги хранат.
Секојдневието во градот е исполнето и со постојана опасност од мини, гранатирања и беспилотни летала. Според сведоштва што ги пренесуваат украинските медиуми, цивилите стравуваат од движење низ улиците, а има случаи во кои телата на загинатите остануваат со денови на отворено.
Украинските власти со месеци бараат воспоставување хуманитарен коридор за евакуација на цивилното население. Омбудсманот Дмитро Лубинец ја опиша состојбата како хуманитарна катастрофа и побара помош од Меѓународниот комитет на Црвениот крст, додека Киев продолжува да инсистира на прекин на огнот за да се овозможи извлекување на жителите.
Според Лубинец, Црвениот крст кон крајот на април се согласил да обезбеди автобуси за евакуација, но руската страна, како што тврди тој, не дала одобрение за операцијата. Од Меѓународниот комитет на Црвениот крст потврдиле дека остануваат во дијалог со надлежните власти од двете страни.
Додека официјалните преговори се без резултат, дел од жителите се обидуваат самостојно да избегаат со помош на волонтери. Ксенија Архипова, која потекнува од Олешки, учествува во организирањето на евакуации и вели дека секоја рута се проверува за мини пред да тргне возилото. Таа наведува дека неделно успеваат да евакуираат меѓу седум и дванаесет лица, со поддршка на хуманитарната организација „Save Ukraine“.
Патот до територијата под контрола на Киев е долг и опасен. Евакуираните најпрво се пренесуваат до окупираниот Скадовск, а потоа преку руска територија до украинско-белоруската граница. Овој пат, според волонтерите, е единствената реална можност за бегство, но само за лицата што поседуваат важечки документи.
Семејствата со деца и луѓето без документи се соочуваат со дополнителни пречки и повеќемесечни процедури, додека сите што патуваат со украински пасоши, според сведоштвата, минуваат низ долготрајни и исцрпувачки контроли на окупациските контролни пунктови.
