И малолетник меѓу осумтемина што возеле без дозвола, приведени вкупно 12 возачи

Дванаесет возачи биле лишени од слобода во изминатото деноноќие на територијата на целата држава поради безобѕирно управување со моторно возило. Осуммина возеле без возачка дозвола, додека кај четворица бил утврдено присуство на алкохол во крвта.

— реклама —

Од Министерството за внатрешни работи информираат дека лицата се лишени од слобода поради сомнение за сторено кривично дело „безобѕирно управување со моторно возило“, предвидено во член 297-а од Кривичниот законик.

Меѓу возачите кои управувале возило без возачка дозвола се четворица скопјани на возраст од 23, 27, 31 и 29 години, 19-годишник од Дебар, 53-годишник од Гостивар, 30-годишник од селото Порој и 17-годишен малолетник од селото Здуње.

— реклама —

Четворица возачи биле затекнати зад воланот под дејство на алкохол. Највисока концентрација била измерена кај 36-годишен битолчанец, кај кого биле утврдени 1,93 промили алкохол во крвта.

— реклама —

Кај 46-годишен жител на Струмица биле измерени 1,84 промили, кај 36-годишен жител на селото Амзабегово, светиниколско, 1,54 промили, додека кај 22-годишен жител на Радовиш биле измерени 1,52 промили алкохол во крвта.

По целосното документирање на случаите, против возачите ќе бидат поднесени соодветни кривични пријави.

— реклама —

Од МВР апелираат до сите учесници во сообраќајот доследно да ги почитуваат правилата и прописите, да не управуваат возило без положен возачки испит, под дејство на алкохол или доколку имаат активна забрана за управување со моторно возило.