Игли и шајки во слатките за Ноќта на вештерките во Германија, Австрија и Унгарија

Полицијата во Германија, Австрија и Унгарија ги предупреди родителите внимателно да ги проверуваат слатките што нивните деца ги добиле за Ноќта на вештерките откако во нив биле пронајдени игли, шајки, завртки и други остри метални предмети.

— реклама —

Случаи биле пријавени во повеќе германски покраини, од Баварија до Долна Саксонија. Во градот Бремерфелде, западно од Хамбург, деветгодишно девојче го повредило јазикот додека јадело чоколадо, во кое подоцна била пронајдена игла долга пет сантиметри.

— реклама —

И во Унгарија е отворена истрага откако во слатки добиени од деца при обиколување на домовите во градот Ѓомро и околината биле пронајдени шајки, завртки и парчиња жица. Едно девојче добило карамела со шајка, скриена во обвивка од чоколадо, но навреме го забележало металниот предмет и не ја изело.

Повеќе случаи се пријавени и во Австрија, каде што истрагите се водат во четири покраини. Во областа Амштетен, источно од Линц, десетгодишно девојче полесно ја повредило устата откако загризало мало чоколадо.

— реклама —

Австрискиот министер за внатрешни работи Герхард Карнер ги осуди инцидентите, оценувајќи ги како злонамерни и опасни по живот. Гувернерката на Долна Австрија, Јохана Микл-Лајтнер, порача дека сторителите мора да одговараат пред законот.

— реклама —

Само во германската покраина Баварија биле пријавени 25 случаи во кои наводно биле пронајдени игли, завртки или шајки во слатки. Полицијата предупредува дека ваквите инциденти може да поттикнат и други лица да ги повторуваат.