„Илјада пати повторена лага на талогот од СДС не станува вистина, мали Фрчко повторно ја загуши „бомбата’’“, вели ВМРО-ДПМНЕ

ВМРО-ДПМНЕ реагираше на денешната прес-конференција на Јон Фрчкоски од СДСМ, отфрлајќи ги наводите за наводни нерегуларности во јавните набавки во Министерството за дигитална трансформација. Од партијата велат дека станува збор за повторување на, како што ги нарекуваат, веќе демантирани тврдења, дополнети со нови инсинуации.

Од ВМРО-ДПМНЕ посочуваат дека уште во март минатата година било соопштено дека вредноста на првата спорна набавка била речиси 40 отсто пониска од планираната, со што, според нив, биле заштедени околу еден милион денари. Оттаму додаваат дека опремата била навремено и квалитетно испорачана и дека на постапката не била поднесена ниту една жалба.

— реклама —

Во реакцијата се наведува и дека државниот секретар во Министерството за дигитална трансформација не учествувал во ниту една фаза од постапките за јавни набавки, додека министерот не учествувал во подготовката на техничките спецификации, евалуацијата и изборот на економските оператори.

„Поврзувањето имиња и компании не е доказ за корупција, судир на интереси или незаконско влијание“, велат од ВМРО-ДПМНЕ, додавајќи дека СДСМ, според нив, се обидува да изгради нова политичка конструкција врз основа на претпоставени поранешни деловни односи меѓу приватни лица.

— реклама —

Во однос на Системот за управување со документи (ДМС), од партијата тврдат дека тој бил наследен како нефункционален, но дека сега активно го користат повеќе од 45 институции. Според нив, системот овозможува електронско и следливо управување со документите и предметите, при што секој предмет има електронска трага и може да се следи неговото движење.

ВМРО-ДПМНЕ тврди дека на денешната прес-конференција на СДСМ не бил презентиран доказ за влијание врз условите на постапките, приспособување критериуми кон одредена компанија, прекршување на закон или незаконски трансфер на средства.

— реклама —

Од партијата уверуваат дека сите постапки во Министерството за дигитална трансформација се спроведуваат согласно законските процедури, преку Електронскиот систем за јавни набавки, од стручни комисии и со целосна документација достапна за проверка.

Во реакцијата се посочуваат и резултатите што, според ВМРО-ДПМНЕ, ги постигнало Министерството. Бројот на електронски услуги, како што наведуваат, се зголемил од 120 на 352, бројот на корисници од 110.000 на повеќе од 266.000, а бројот на поднесени барања од 64.000 на над 340.000.

Од ВМРО-ДПМНЕ додаваат дека напредокот на Македонија во дигиталната трансформација и сајбер-безбедноста е потврден и во меѓународни извештаи и индекси.

„Додека тие рециклираат демантирани лаги, Министерството за дигитална трансформација испорачува конкретни резултати за граѓаните“, се наведува во партиската реакција.