По неколкумесечните протести што ја потресуваат Србија, илјадници граѓани повторно излегоа на улиците, овојпат во Нови Сад, испраќајќи пораки за неопходни политички и институционални промени, додека претседателот Александар Вучиќ најави можност за одржување избори наесен.
На големиот студентски собир, одржан во саботата во Нови Сад, учесниците порачаа дека нема да се откажат од своите барања и најавија дека во текот на летото движењето ќе се шири низ цела Србија.
Протестот, организиран од студенти, вклучуваше дискусии за изборниот систем, состојбата во полицијата, судството и медиумите, како и за сè поголемата недоверба на граѓаните во институциите. Активистите истакнаа дека нивната цел е поширока мобилизација на општеството и зголемување на притисокот за политички промени.
Катерина Перовиќ, активистка од „Гласовите на младите на општина Кула“, порача дека „Србија не е Српската напредна странка, ниту Александар Вучиќ, туку сите граѓани“. Професорката Сања Белиќ од Природно-математичкиот факултет оцени дека уцените и купувањето гласови претставуваат едни од најголемите проблеми на системот и ги повика граѓаните активно да учествуваат на изборите.
Студентката Матеја Магда од Правниот факултет нагласи дека Нови Сад е „местото каде што сè започна“, алудирајќи на трагедијата на железничката станица, и најави летни активности „од врата до врата“ со цел да се прошири поддршката за студентското движење.
На протестот присуствуваа и повеќе јавни личности, меѓу кои кошаркарската легенда Дејан Бодирога и ректорот на Универзитетот во Белград, Владан Ѓокиќ. Според локалните медиуми, собирот поминал мирно и без инциденти. Организаторите и медиумите не објавија официјален број на учесници, додека претседателот Вучиќ изјави дека на протестот присуствувале околу 3.300 луѓе.
Станува збор за прв поголем студентски протест по собирот во Белград, одржан на 23 мај, и продолжение на активностите што започнаа по трагедијата на железничката станица во Нови Сад на 1 ноември 2024 година, кога при уривање на настрешница загинаа 16 лица. Демонстрантите и натаму бараат политичка и кривична одговорност за несреќата.
Во меѓувреме, студентското движење прерасна во поширока политичка платформа која бара предвремени избори, подобри изборни услови и поголема отчетност на институциите.
Од друга страна, српските власти упатија критики кон студентските протести, додека Вучиќ најави дека на состанокот на Српската напредна странка, закажан за 27 јуни во Белград, ќе се разговара за можни избори и идните политички чекори. Тој посочи дека изборите би можеле да се одржат во октомври или ноември, без да прецизира дали станува збор за парламентарни или претседателски избори.
