Им одзеле пиштол на полицајци и бегале со „бмв“: Кривични пријави за случајот во кој приведените беа тепани, ги гонат и за тргување со дрога

Кривични пријави се поднесени против три лица за случајот во кој двајца млади скопјани бегаа од полицијата со одземен службен пиштол, по што беа приведени, а во јавноста се појавија информации и за нивно физичко малтретирање од полициски службеници. Министерството за внатрешни работи денеска соопшти детали за настанот од 7 октомври, потврдувајќи дека случајот го испитува и Одделот за внатрешна контрола поради можни неправилности во полициското постапување.

Според МВР, инцидентот започнал околу 20:25 часот на улицата „Црногорска“ во Скопје, каде што полицијата поставила заседа за автомобил „бмв“, по претходни оперативни сознанија за планирана купопродажба на марихуана.

— реклама —

Полициските службеници му дале знак на возачот да запре, но кога се приближиле за легитимирање и преглед, тој го стартувал автомобилот и удрил во бандера. Во истиот момент, според полицијата, низ прозорецот фрлил кеса со марихуана.

Еден од полицајците го извадил службениот пиштол и преку полуотворениот прозорец од совозачката страна наредил: „Стој, полиција!“. Тогаш совозачот му го одзел пиштолот, а возачот повторно го стартувал автомобилот и побегнал.

— реклама —

Следувала полициска потера по улицата „Ѓорче Петров“, кон автопатот Скопје – Тетово. Возачот, според МВР, не ги почитувал светлосните и звучните сигнали, а еден полициски службеник испукал три предупредувачки истрели во воздух.

Потерата завршила кога „бмв“-то удрило во заштитната ограда на автопатот и се извртело. Од автомобилот излегле возачот П.А. (24) и совозачот Е.П. (21), кои биле приведени. Полицијата го одзела службениот пиштол, а при пребарување на теренот ја пронашла и кесата со марихуана.

Против двајцата денеска се поднесени кривични пријави за „спречување службено лице во вршење службено дејствие“ и „неовластено производство и пуштање во промет на наркотични дроги, психотропни супстанции и прекурсори“.

— реклама —

Кривична пријава за делото поврзано со наркотични дроги е поднесена и против М.Т., за кого полицијата располага со сознанија дека е поврзан со случајот.

Особено значаен е делот од соопштението во кој МВР потврдува дека за настанот е известен Одделот за внатрешна контрола, криминалистички истраги и професионални стандарди.

Овој оддел презема мерки за утврдување евентуални неправилности во постапувањето на полицајците, во случајот што го отвори и прашањето за употребата на сила врз приведените лица.

Од денешното соопштение не може да се утврди дали внатрешната контрола веќе констатирала пречекорување на полициските овластувања, ниту дали против некој полициски службеник е поведена постапка.