Имаат само 16 и 17 години, но наместо врева, насилство и вандализам, тие избираат да оставаат трага на сосема поинаков начин – со хуманост.
Лука Јоакимовски има 16, а Дони Божинов 17 години. Во време кога младите често се поврзуваат со слики на насилство, вандализам и уништување, овие двајца средношколци покажуваат дека младоста може да изгледа и поинаку.
Тие се дел од Меморијалниот турнир „Златко Божинов – Божо“, преку кој заедно со донатори, спонзори и поддржувачи организирале хуманитарна акција за да им помогнат на најмалите.
Обезбедени се училишни ранци и прибор за првачињата од македонската паралелка во ООУ „Панајот Гиновски“ во Општина Чаир, а помош е обезбедена и за едно семејство од Топанско Поле.
Нивната порака е едноставна – не мора да имаш многу години за да направиш нешто големо.
Додека едни зборуваат за тоа како да се искоренат насилството и вандализмот меѓу младите, Лука и Дони со својот пример покажуваат што може да се направи кога енергијата на младоста ќе се насочи кон нешто позитивно.
Нивната приказна не е само хуманитарна акција. Таа е потсетник дека примерот најчесто зборува погласно од зборовите.
И дека понекогаш токму најмладите можат да покажат какви луѓе сакаме да бидат младите околу нас.
