„Имате 48 часа да поднесете оставки“: Седум филмски здруженија бараат смена на раководството на Филмскиот центар на Србија

Седум филмски здруженија во Србија бараат од членовите на Управниот одбор на Филмскиот центар на Србија во рок од 48 часа да поднесат оставки од своите функции во овој одбор. Исто барање му упатиле и на вршителот на должноста директор на ФЦС, Јаков Петровиќ.

Асоцијацијата на филмски режисери на Србија, Здружението на филмски продуценти, Здружението на филмски уметници на Србија, Здружението на сценаристи на Србија, Српската асоцијација на кинематографери и Здружението на документаристи на Србија упатиле отворено писмо до членовите на Управниот одбор на Филмскиот центар на Србија, како и до вршителот на должноста директор на оваа институција, Јаков Петровиќ.

— реклама —

Во писмото, упатено до претседателот на Управниот одбор на ФЦС, Мирослав Лекиќ, членовите Милутин Петровиќ, Ненад Јанковиќ и Соња Дамњановиќ, како и до вршителот на должноста директор Петровиќ, здруженијата најпрво посочуваат дека Филмскиот центар на Србија веќе две години на никаков начин не ја исполнува својата основна мисија, утврдена со Законот за кинематографија и Статутот на ФЦС.

Таа мисија, потсетуваат здруженијата, подразбира системска поддршка на филмското творештво во Република Србија.

— реклама —

„Затоа бараме во рок од 48 часа да поднесете неотповикливи оставки од функциите вршител на должноста директор, односно членови на Управниот одбор“, нагласуваат овие здруженија во писмото.

Тие бараат и до изборот на новото раководство, во согласност со законот, да не се започнуваат измени на Статутот на ФЦС без јавна расправа и учество на професионалните здруженија.

— реклама —

Исто така, бараат да не се носат одлуки за доделување и исплата на средства, вклучително и одлуки поврзани со работата на комисијата за стимулации, освен за подмирување на постојните обврски кон продукциските куќи.

„Секоја одлука донесена во овој период ќе ја следиме и ќе ја проследиме до правниот тим на професионалните здруженија за процена на нејзината законитост, а вас лично ќе ве повикаме на кривична одговорност“, предупредуваат седумте здруженија.

Да потсетиме, Филмскиот центар на Србија втора година по ред нема распишано ниту еден конкурс за кофинансирање филмови, поради што српската кинематографија практично е блокирана.

Исто така, минатата недела овие седум здруженија најавија поднесување кривична пријава до Јавното обвинителство за организиран криминал против досегашниот министер за култура на Србија, Никола Селаковиќ и неговите соизвршители, поради сомнежи за организиран криминал и намерно уништување на домашната филмска продукција.