Водата од водоводната мрежа во Гостивар во моментов е неисправна и за пиење и за техничка употреба, покажале анализите на Институтот за јавно здравје, поради што надлежните институции апелираат граѓаните да не ја користат до понатамошно известување.
Ова беше соопштено по денешната седница на Главниот штаб при Центарот за управување со кризи, со која претседаваше министерот за внатрешни работи Панче Тошковски, во присуство на директорот на ЦУК, Мухамет Али. На седницата биле разгледани информациите и анализите за состојбата со водоснабдувањето во Општина Гостивар, по што биле донесени повеќе мерки за заштита на здравјето на граѓаните.
Главниот штаб ја задолжил Општина Гостивар итно да предложи локации и контакт-лица за поставување пунктови за дистрибуција на техничка вода за објектите од витално значење. Во меѓувреме, Институтот за јавно здравје, ЈП „Водовод“ – Скопје и Агенцијата за храна и ветеринарство ќе продолжат со засилени испитувања на квалитетот на водата, а резултатите редовно ќе ги доставуваат до Главниот штаб.
Армијата на Македонија ги ставила во приправност двете цистерни за дистрибуција на техничка вода, кои ќе бидат ангажирани доколку надлежните проценат дека има потреба.
Дополнително, општините Куманово, Тетово, Дебар, Кичево, Кавадарци и Неготино ќе обезбедат техничка вода со сопствени цистерни за потребите на жителите на Гостивар, на однапред определени пунктови.
Во согласност со владината одлука, Службата за општи и заеднички работи ќе продолжи со дистрибуција на вода за пиење до граѓаните на Општина Гостивар.
Од Центарот за управување со кризи апелираат жителите на Гостивар доследно да ги почитуваат препораките на надлежните институции и редовно да ги следат официјалните информации за понатамошниот развој на состојбата.
