Иран постави „црвена линија“: Признавањето на правото на збогатување ураниум е клучно

Барањата на САД во однос на иранската нуклеарна програма се спротивни на позициите на Техеран, изјавил висок ирански претставник за „Ројтерс“, коментирајќи ги изјавите на американскиот потпретседател Џеј Ди Венс дека Иран мора значително да ги намали капацитетите за збогатување ураниум за да заврши конфликтот.

Иранскиот претставник, кој е вклучен во индиректните преговори со САД, рекол дека изјавите на Венс ги претставуваат барањата и предлозите на Вашингтон, но дека тие не се во согласност со барањата на Техеран.

— реклама —

Тој додал дека во моментов нема преговори меѓу Иран и САД за нуклеарната програма. Според него, Вашингтон прво треба да ги исполни условите на Техеран за воопшто да може да започне преговарачкиот процес.

— реклама —

Како „црвена линија“ за Иран го посочил признавањето на правото на земјата да збогатува нуклеарен материјал. За деталите околу начинот на спроведување на тој процес, сепак, може да се разговара, навел тој.

Венс во интервју за „Ројтерс“ изјавил дека Иран мора значително да ги намали капацитетите за збогатување ураниум за да ги исполни американските барања и да се стави крај на седуммесечниот конфликт меѓу двете земји.

— реклама —

Венс има водечка улога во разговорите за решавање на конфликтот, а во јуни учествувал во постигнувањето привремен мировен договор кој набргу пропаднал. Конфликтот влијаел и врз глобалните енергетски пазари и станал политички товар за американскиот претседател Доналд Трамп и неговите републиканци пред конгресните избори во ноември.

Венс изјавил дека САД разговараат со иранскиот претседател Масуд Пезешкијан и министерот за надворешни работи Абас Арагчи, но дека не е јасно колкава реална власт имаат тие во иранската структура на управување по убиството на врховниот лидер, ајатолахот Али Хамнеи, во американско-израелските напади на почетокот на конфликтот.

Тој исто така рекол дека разговарал со воени команданти на терен за да ја процени состојбата на боиштето. Венс навел дека иранските сили повремено успеваат да напаѓаат трговски бродови во Ормускиот Теснец, но дека главно не се во состојба да го спречат извозот на енергенси преку овој пловен пат.