Иран повторно ја предупреди Бугарија поради американските воени бази

Иран упати ново предупредување до Бугарија поради одлуката да им овозможи на САД користење на нејзините воени бази, со што дополнително се зголемија дипломатските тензии меѓу Техеран и Софија.

— реклама —

Портпаролот на иранското Министерство за надворешни работи, Есмаил Багаеи, преку социјалните мрежи порача дека бугарските власти ќе треба да сносат одговорност за, како што наведе, „опасната одлука“ американски авиони за воздушно дополнување со гориво да бидат распоредени во бугарски воени бази.

Според Техеран, ова не е изолиран случај, туку дел од претходни одлуки со кои, како што тврди, Бугарија им давала поддршка на американските воени операции против Иран. Во пораката се нагласува дека иранскиот народ никогаш немал проблеми со Бугарија и дека односите меѓу двете земји со децении се темелеле на меѓусебна почит.

— реклама —

Новата реакција на Иран доаѓа неколку дена откако американскиот претседател Доналд Трамп јавно му се заблагодари на бугарскиот премиер Румен Радев за поддршката за распоредувањето американски воени авиони во земјата.

— реклама —

Во меѓувреме, бугарскиот министер за одбрана Димитар Стојанов изјави дека не очекува ирански ракетен напад врз Бугарија, иако призна дека „сè е можно“. Тој оцени и дека ризикот од терористички напади е помал отколку во периодот кога американските авиони биле сместени на цивилен аеродром.

Бугарскиот парламент неодамна го одобри преместувањето на американските авиони во воената воздухопловна база „Безмер“, одлука што предизвика протести кај локалното население поради стравувањата дека регионот би можел да стане потенцијална цел во услови на зголемени тензии на Блискиот Исток.

— реклама —