Нова серија ирански напади дополнително ги зголеми тензиите на Блискиот Исток, откако ракети и беспилотни летала беа насочени кон цели во повеќе земји од Заливот, меѓу кои и Кувајт. Кувајските сили ја ставија противвоздушната одбрана во состојба на целосна готовност, а во земјата се огласија и сирени за воздушна опасност.
Кувајтското Министерство за одбрана соопшти дека системите за противвоздушна одбрана откриле и дејствувале против 13 балистички ракети и 17 беспилотни летала лансирани од Иран.
Генералштабот на вооружените сили на Кувајт соопшти дека силните експлозии што се слушале во различни делови од земјата биле поврзани со пресретнување и уништување на непријателски цели во воздух.
Граѓаните биле повикани да останат смирени, да бидат внимателни и строго да ги следат безбедносните упатства на властите.
Според досегашните информации, главните цели на иранските напади биле американски воени позиции во регионот. Нападите се дел од пошироката ескалација меѓу Иран и САД, по новите американски удари врз ирански цели.
Иран истовремено нападнал американски цели и во други земји од Заливот, меѓу кои Бахреин, додека ракети и беспилотни летала биле насочени и кон цели во Јордан и Ирак.
Најновите напади следуваат по американските воени операции поврзани со состојбата во Ормускиот Теснец. Вашингтон тврди дека неговите активности се насочени кон спречување на ирански дејствија за кои смета дека ја загрозуваат пловидбата низ еден од најважните поморски правци во светот.
Кувајтските власти ги повикаа граѓаните да ги следат официјалните информации, додека безбедносните служби остануваат во состојба на висока готовност.
Најновата ескалација покажува дека конфликтот меѓу Вашингтон и Техеран сè повеќе се прелева во земјите од Заливот, каде што се распоредени американски воени сили, зголемувајќи го стравот од поширок регионален конфликт.
