Полицијата затекнала ископ на песок од речно корито во струмичко село, при што било утврдено дека товарно возило било натоварено со околу девет кубни метри песок без приложена соодветна документација.
Од МВР информираат дека на 17 септември 2026 година, постапувајќи по претходна пријава за ископ на песок во река во село Доброшинци, струмичко, полициски службеници од СВР Струмица, по овластување на јавен обвинител, излегле на местото.
Таму биле затекнати товарно возило и работна машина – копач, сопственост на правно лице-сепарација од село Сачево, струмичко. Во моментот на контролата, двајца вработени вршеле ископ.
За случајот бил известен Државниот инспектор за животна средина, а по насока на јавниот обвинител бил ангажиран и геодет. Тој констатирал дека се врши ископ, како и дека товарното возило било натоварено со околу девет кубни метри песок.
Од правното лице, според МВР, не била приложена соодветна документација за ископот, како барање, договор, елаборат и друга документација.
Полицијата продолжува со расчистување на случајот, по што ќе следува соодветна пријава.
