Скејт-паркот кој се наоѓа во близина на Градскиот парк, на кејот на реката Вардар, е во целосно запуштена и небезбедна состојба.
Читател ни испрати видео на кое се гледа дека просторот е демолиран – искршени се даските, на повеќе места има поголеми и помали дупки, а дел од оградата е отстранета.
Скејт-паркот беше изграден пред десетина години со цел да им обезбеди на скејтерите и љубителите на урбаните спортови безбеден простор за рекреација. Но, веќе подолг период наместо место за спорт и забава, тој е оставен да пропаѓа.
Скејтерите одамна не го користат просторот, бидејќи движењето низ него претставува сериозен ризик од повреди.
Од место наменето за спорт и рекреација, скејт-паркот кај Вардар денес е пример за запуштен јавен простор кој наместо да ги привлекува младите, претставува опасност за нив.
