Истекува азотна киселина од превртен камион во Германија, жителите добија наредба да останат дома

Голема опасност им се заканува на жителите на германскиот град Крефелд откако камион натоварен со азотна киселина се превртел во текот на ноќта на автопатот А57, а опасната материја почнала да истекува. Властите го активирале највисокиот степен на предупредување и ги повикале жителите во околината да останат во затворен простор.

— реклама —

Од противпожарната служба во Крефелд информирале дека од камионот истекува висококорозивна киселина. Возачот се здобил со полесни повреди и бил пренесен во болница, објави германскиот портал „Т-Онлајн“.

— реклама —

На местото на несреќата интервенираат околу 150 припадници на итните служби, кои се обидуваат да го запрат истекувањето и да ја испумпаат киселината од камионот. Подрачјето во радиус од еден километар околу местото на несреќата е оградено.

Поради опасноста, автопатот А57 е затворен во делницата меѓу излезите Крефелд-Опум и Крефелд-Гартенштат. Затворени се и неколку градски улици, а дел од училиштата и градинките нема да работат во текот на целиот ден. Железничкиот сообраќај во регионот е делумно прекинат.

— реклама —

Највисокото ниво на опасност важи за жителите во близина на излезот Крефелд-Центар, на кои им е наредено да останат во своите домови и да не ги напуштаат зградите. За целиот град, кој има околу 230.000 жители, е издадено портокалово предупредување, а граѓаните добиваат известувања преку државната апликација НИНА.

— реклама —

Азотната киселина е една од основните хемикалии во индустријата и најчесто се користи за производство на вештачки ѓубрива и експлозиви.