Познатиот македонски маратонец Игор Јакимовски објави дека во Марибор, Словенија, е испишана нова страница во македонската атлетика, откако младиот репрезентативец Огнен Стефановски поставил нов национален рекорд во декатлон.
Стефановски, кој настапува за АК Делта, освоил вкупно 7.189 бодови, што според табелите на World Athletics вреди 1.002 ИААФ бодови.
„Македонија конечно после долги години дочека нов атлетичар кој ја проби оваа магична граница“, напиша Јакимовски.
Стефановски рекордот го поставил на неполни 22 години, а според Јакимовски, дури во 2028 година ќе настапува како сениор.
Во десетте дисциплини тој ги постигнал следните резултати:
– 100 метри: 11.10
– Скок во далечина: 6.97 м
– Ѓуле: 12.29 м
– Скок во височина: 1.84 м
– 400 метри: 48.84
– 110 метри со пречки: 15.07
– Диск: 38.53 м
– Скок со стап: 3.90 м
– Копје: 49.82 м
– 1.500 метри: 4:31.07
Јакимовски посочува дека декатлонот е една од најтешките атлетски дисциплини и дека за да се тренираат и совладаат 10 различни дисциплини „треба да си машина од човек“.
Тој додава дека Стефановски тренира во „услови рамни на нула“ и постојано патува низ Балканот за да може да настапува на повеќебои.
Во објавата, Јакимовски упати и критики кон Атлетската федерација, тврдејќи дека рекордите на македонските атлетичари не се ажурираат на официјалната веб-страница и дека Стефановски не добива доволна поддршка.
„Да ја прочитаат многу спонзори и добри луѓе и да му помогнат на Огнен за да успее во иднина во оваа дисциплина која бара многу жртва, тренирање, патувања и големи финансиски средства“, напиша Јакимовски.
