Меѓународен тим научници од Франција откри дека песните на птиците, и покрај нивната огромна разновидност, се составени од само осум основни видови звуци. До ова откритие дошле по анализа на повеќе од 100.000 снимки од околу 3.000 различни видови птици.
Истражувачите утврдиле дека секоја песна е комбинација од осум таканаречени „мотиви“ – три вида трилери, три вида свирежи, хаотични тонови и хармонични звуци.
Птичјиот пој долго време ги фасцинира биолозите поради својата сложеност, но досега било тешко да се анализира на глобално ниво поради огромниот број различни мелодии.
Водечкиот автор на истражувањето, Квентан Бакле од Универзитетот во Сент Етјен, посочува дека песните значително се разликуваат од еден до друг дел на светот. За потребите на студијата биле искористени снимки од светска база на податоци, во која илјадници волонтери со години прикачуваат аудиозаписи од птици.
Со помош на вештачка интелигенција, научниците ги споредиле илјадниците снимки и ги откриле заедничките обрасци во нивната структура.
Истражувањето покажало дека средината во која еволуирале птиците има клучно влијание врз начинот на кој ги создаваат своите песни. Видовите што живеат во тропските шуми најчесто користат поедноставни свирежи, бидејќи тие полесно се слушаат во густата вегетација и бучната природна средина.
Од друга страна, птиците во шумите со умерена клима почесто изведуваат посложени композиции со брзи трилери и комбинации што пренесуваат повеќе информации, бидејќи најчесто комуницираат на пократки растојанија.
Според научниците, ова претставува еволутивен компромис – сложените песни можат да пренесат повеќе информации, но потешко се слушаат на големи растојанија во комплексна средина.
Авторите оценуваат дека ова истражување отвора нов поглед кон разбирањето на птичјиот пој и покажува колку силно тој е поврзан со природната средина во која живеат птиците.
