Новинарката Ивона Талевска беше сведок на рочиштето за предметот „Плацови на Водно“. Таа раскажуваше за текст кој го пишувала пред скоро десет години, а бил за преземањето на просториите од државната кардиохирургија. Преку ова, сакаше да ги објасни кои биле релациите меѓу бизнисменот Орце Камчев и експремиерот Никола Груевски.
Па така, таа кажа дека барала информации од тогашниот министер за здравство, но бидејќи тој не бил во земјата, добила средба кај тогашниот премиер Никола Груевски. Со него разговарала за темата за која пишувала, па добила впечаток дека тој бил во лоши односи со Камчев, обвинет во предметот „Плацови на Водно“.
Таа се присети на периодот, па објасни дека објавила наслов: „Камчев ја лути Владата“. По ова, Талевска посочи дека имала контакт и со Камчев, кој и бил многу лут. Прашања до Талевска имаше и самиот бизнисмен. Тој низ прашање, посочи дека имал докази дека во тој период, Груевски нарачувал текстови против него.
На крајот, Талевска беше испрашувана и од судијата Илија Трпков. Него го интересираше какви биле односите меѓу обвинетиот Сашо Мијалков и Орце Камчев во истиот период, кога веќе знаела какви се односите меѓу Груевски и Камчев. На Талевска прво не и беше јасно прашањето, па судијата го повтори. Па така, таа оцени дека не биле многу добри.
Судијата Трпков потоа ја праша Талевска и за односите на Груевски со Мијалков, а таа во одговорот додаде и: „Не е едноставно да се биде премиер“, објаснувајќи како работел Груевски.
