Вицепремиерот и актуелен министер за животна средина, Изет Меџити, е официјален кандидат на ВЛЕН за градоначалник на Општина Чаир на претстојните локални избори. Меџити, ќе се соочи со противкандидатот од „Европскиот фронт“ на ДУИ – поранешниот министер за надворешни работи, Бујар Османи.
Од Централното претседателство на ВЛЕН информираат дека се избрани кандидати за градоначалници во повеќе општини ширум државата. Во Тетово ќе се кандидира актуелниот градоначалник Билал Касами, додека во Струга поддршка ќе добие независниот кандидат Менди Ќира. За Кичево, ВЛЕН ќе го промовира министерот за социјална политика, демографија и млади – Фатмир Лимани.
Во трката за градоначалник на Скопје, коалицијата ќе настапи со Башким Бакиу, директор на Дирекцијата за општи услуги во УКЦ Скопје. Во другите општини, ВЛЕН ги кандидира следниве личности:
Дебар: Фисник Мела, заменик-директор на УЈП
Сарај: Мухамед Елмази, директор на „Номагас“
Липково: Неџмедин Садику, директор на Државните резерви на нафта
Арачиново: Даут Беќири
Желино: Блерим Сејдиу, актуелен градоначалник
Теарце: Даут Мемиши, директор на Бирото за регионален развој
Брвеница: Хаќим Рамадани, директор на Државниот инспекторат за локална самоуправа
ВЛЕН со оваа листа покажува сериозна намера да се наметне како водечки албански политички блок на локално ниво, најавувајќи директна политичка пресметка со ДУИ во повеќе општини.
