Пожарот што денеска избувна во близина на расадникот и складот на ЈП „Македонски Шуми“ во Куманово беше еден од најсериозните во текот на денот, при што целосно изгореле две моторни возила, еден трактор и одредена количина складирани огревни дрва. Ова преку објава на Фејсбук го соопшти заменик-директорот на ЈП „Македонски Шуми“, Кире Михаилов, кој предупреди дека постојат сериозни индиции оти пожарот е намерно предизвикан.
„Иако е релативно рано, сепак, месецов јуни годинава го "преживуваме" со околу десетина пожари на отворен простор дневно, а некогаш дури околу петнаесетина.
Во текот на денешниов ден имаше 12 пожари, од кои дури 3 пожари во Кумановско и тоа овој кај нашиот расадник, еден кај Бедиње и еден кај Режановце.
Пожарот во близина на расадникот, покрај тоа што "чудесно" се појави на двете страни и покрај широкото речно корито на реката Кумановка, нашите служби алармираа дека на местото на пожарот има мирис на бензин или улје, што само по себе алармира дека некој најверотно нешто намерно прави.
И самиот градоначалник на Куманово пред малку излезе со јавен јасен став дека не само овој, туку и останатите 2 пожари кои ги имаше денеска во кумановско се од човечки фактор.
Покрај пожарите во кумановско, до 18 часот денеска сеуште беа активни и пожари на депонијата во Пехчево, пожар помеѓу селата Тркање и Бање во Општина Чешиново-Облешево и пожар во близина на Злетовска Брана во Општина Пробиштип.
Под контрола е ставен пожар кај селото Дворци во Општина Пласница, каде што во текот на денешниот ден горела депонија.
Исто така, во текот на денешниот ден целосно се изгаснати уште 6 пожари на подрачјата на општините Валандово, Инџиково, Старо Нагоричане, Врапчиште, Свети Николе и Дебар.
Почетокот на оваа најавено релативно жешка сезона ни најавува дека одредени наши сограѓани повторно како и во минатото имаат намера да си играат со нервите, но пред се останато, со здравјето на нашите сограѓани
Како и да е, ние остануваме максимално посветени да се бориме со сите предизвици кои не очекуваат во периодов кој следи.“, вели Михаилов.
