Владејачката ВМРО-ДПМНЕ тврди дека предложените измени на Законот за минерални суровини не претставуваат закана за животната средина, туку напротив, ги зајакнуваат механизмите за нејзина заштита и ја зголемуваат улогата на државата во управувањето со ресурсите од стратешко значење.
Од партијата нагласуваат дека измените се ограничени по опфат и се однесуваат исклучиво на јавни претпријатија и субјекти врз кои државата има директна или индиректна контрола, како и на минерални суровини од јавен интерес, пред сѐ енергетски ресурси како јагленот.
„Предлог измените на Законот за минерални суровини не се закана за животната средина, затоа што на сила остануваат сите постојни механизми за нејзина заштита“, соопштија од ВМРО-ДПМНЕ.
Во реакцијата се посочува дека не се менуваат еколошките стандарди, ниту се укинува обврската за изработка на студии за влијание врз животната средина, како и дека не се намалуваат механизмите за инспекциски надзор.
„Важно е да се напомене дека во ниеден случај не се менуваат еколошките стандарди, не се укинува обврската за студии за влијание врз животната средина, не се намалуваат механизмите за инспекциски надзор и контрола и не се отвора простор за неконтролирано доделување концесии на приватни субјекти“, наведуваат од партијата.
Според нив, измените предвидуваат Владата да дава претходна согласност при доделување концесии за детални геолошки истражувања за одредени категории минерални суровини од јавен интерес, што, како што оценуваат, значи повисоко ниво на одлучување и поголема институционална одговорност.
Дополнително, измените овозможуваат во постапката за добивање дозвола за експлоатација да се земе предвид и одлука за поведување постапка за експропријација, но само во случаи на проекти од јавен интерес.
„Ова не е олеснување на процедурите, туку вклучување на највисокото ниво на одлучување, што значи поголема одговорност и институционална контрола“, наведуваат од ВМРО-ДПМНЕ.
Од партијата додаваат дека целта е надминување на административните пречки кои досега ја отежнувале реализацијата на проекти, особено во енергетиката, при што се задржуваат високите стандарди за заштита на животната средина.
„Сето ова не значи либерализација, туку поефикасни постапки, повисоко ниво на контрола на државата, високи еколошки стандарди и зајакнати механизми за заштита на животната средина“, порачуваат од ВМРО-ДПМНЕ.
