СВР Охрид поднесе кривична пријава против А.М. (61) од Струга поради сомнение за сторени кривични дела „злоупотреба на службена положба и овластување“, „несовесно работење во службата“ и „фалсификување службена исправа“.
Според МВР, пријавениот бил вработен во Министерството за финансии – Управа за имотно-правни работи Струга, на работно место советник и овластен потписник на акти.
Во текот на 2022, 2023 и 2024 година, тој, злоупотребувајќи ја службената положба и овластувањата, наводно изработувал лажни решенија за приватизација на земјиште на други лица. Потоа, самоволно ставал службен печат за правосилност на решенијата и ги доставувал до Одделението за катастар на недвижности Струга.
Како што информира МВР, решенијата претходно не биле доставувани до надлежна институција за добивање мислење.
