Претседателот на СДСМ, Венко Филипче, на денешната прес-конференција оцени дека најновиот извештај на Европскиот парламент ги потврдува предупредувањата на неговата партија за присуство на странско влијание и ширење антиевропски наративи во македонскиот јавен простор.
На прес-конференција, Филипче посочи дека во извештајот се изразува загриженост поради странско мешање, вклучително и преку медиуми под унгарско влијание, кои, според него, придонесуваат за ширење пораки насочени против европската интеграција на државата.
„Извештајот на Европскиот парламент го потврдува она што со месеци го посочуваме. Во документот се изразува загриженост за преземањето на клучни телевизии и новински портали од страна на унгарски медиумски структури, со што се овозможува антиевропските наративи да станат дел од јавната дебата“, изјави Филипче.
Според него, ваквите оценки се доказ дека Владата не работи доволно на европската агенда и дозволува создавање атмосфера на недоверба кон Европската Унија.
Филипче истакна дека Европскиот парламент во извештајот укажува и на недоволно спроведување на реформите, како и на недостиг од политичка волја за продолжување на евроинтегративниот процес.
Тој оцени дека наместо фокус на реформите, власта ја користи темата за идентитетот како средство за политичка мобилизација и прикривање на неуспесите.
„Европскиот пат се претставува како закана за националниот идентитет, што не е точно. Европската Унија се темели на почитување на различностите, јазикот и идентитетот на сите народи. Наместо вистински реформи, се пласира реторика која создава страв кај граѓаните“, рече Филипче.
Лидерот на СДСМ предупреди дека ширењето антиевропски пораки и постојаното заплашување на јавноста може дополнително да ја оддалечат државата од европските интеграции и да доведат до изолација.
Тој ги повика граѓаните да не подлегнуваат на, како што рече, популистички и националистички пораки, нагласувајќи дека иднината на државата е поврзана со продолжување на реформите и европскиот пат.
