Од Единицата за економски и компјутерски криминал при СВР Скопје, по насоки од Основното јавно обвинителство, бил извршен службен разговор со три лица во врска со пријава поднесена од Министерството за земјоделство, шумарство и водостопанство.
Како што информираат од Министерството за внатрешни работи, пријавата се однесува на сомнение за кривично дело „злоупотреба на службена положба и овластување“ по член 353 од Кривичниот законик.
Според пријавата, станува збор за јавен повик распишан во 2023 година за финансиска поддршка на микроземјоделски производители на вино, при што без законска основа биле распределени над 50 милиони денари, односно повеќе од 820.000 евра, од буџетот на Министерството за земјоделство, шумарство и водостопанство.
Во рамки на постапката, побарана е и дополнителна документација од Министерството за земјоделство, шумарство и водостопанство со цел целосно расчистување на случајот.
