Германскиот град Келкхајм е потресен од брутално убиство што се случило во вторникот вечерта, кога 58-годишната Вишња С., жена со потекло од Хрватска, била смртно избодена на градскиот плоштад.
За убиството е осомничен нејзиниот 60-годишен поранешен сопруг Станислав С., кој по нападот бил совладан од случајни минувачи и задржан до пристигнувањето на полицијата. Тој е уапсен и му е одреден притвор.
Според обвинителството, нападот се случил околу 21 часот пред кафуле на плоштадот. Осомничениот ѝ пришол на поранешната сопруга и ја нападнал со оружје слично на мачета, нанесувајќи ѝ најмалку 30 убодни рани. И покрај обидот да се оддалечи, жената по неколку метри паднала и починала на местото на нападот.
Очевидци успеале да го совладаат напаѓачот и да го задржат до пристигнувањето на полицијата. При апсењето и самиот осомничен се здобил со повреди, а на бројните сведоци им била обезбедена психолошка помош.
Според германските истражни органи, поранешните сопружници биле во брак 35 години и имаат возрасен син. По разделбата, Станислав С. се вратил во Хрватска, но пред четири години повторно дошол во Германија со намера да ја обнови врската. Жената тоа го одбила, но му дозволила да живее во нејзиниот стан бидејќи немал каде да престојува.
Обвинителството наведува дека осомничениот не можел да се помири со нејзината одлука за развод, изразена во август минатата година, и повеќепати ѝ се заканувал дека ќе ја убие. Како можен мотив се посочуваат љубомората и посесивноста, бидејќи верувал дека таа има друг партнер.
Пријатели и соседи сведочат дека кавгите меѓу двајцата биле чести и дека жената живеела во постојан страв. Тие тврдат дека осомничениот бил агресивен и често консумирал алкохол.
По трагедијата, жителите на Келкхајм оставаат цвеќе и палат свеќи на местото каде што била убиена Вишња С., додека градот останува во шок од злосторството.
