Јанев најави промени во полицијата: дигитализација, нови алатки и интервентни тимови

Дигитализација, воведување современи оперативни алатки и реорганизација на работата се дел од промените што се планираат во полицијата, со цел зголемување на ефикасноста и подобрување на безбедноста. За овие планови и предизвиците со кои се соочуваат полициските службеници се разговарало на работна средба во Велес, на која директорот на Бирото за јавна безбедност, Александар Јанев, се сретнал со раководните структури на полицијата.

На средбата, одржана на 16 октомври, присуствувале раководители на секторите за внатрешни работи и униформираната полиција, командири на полициските станици и раководители на полициските одделенија од СВР Струмица, Велес, Штип, Куманово и Скопје. Присутни биле и претставници на регионалните центри за гранични работи Север и Исток, објави 4news.mk.

— реклама —

Во фокусот на разговорите биле актуелните проблеми во секојдневното работење, потребите на полициските службеници и планираните реформи за унапредување на професионалноста и ефикасноста на полицијата.

— реклама —

Јанев ја претставил визијата за развој на полицијата на краток, среден и долг рок, при што посебен акцент ставил на примената на современи технологии, воведувањето нови оперативни алатки, реорганизацијата на работата и дополнителните инвестиции.

Една од планираните промени е формирањето интервентни тимови во регионалните сектори, кои треба да ја подобрат оперативната подготвеност и да овозможат поефикасно постапување на терен.

— реклама —

На средбата била истакната и важноста на човечкиот потенцијал, добрата координација меѓу организациските единици и непосредната комуникација, како важни предуслови за успешно спроведување на реформите.

Директорот на Бирото за јавна безбедност нагласил дека секој полициски службеник има значајна улога во функционирањето на безбедносниот систем. Планираните промени и инвестиции треба да придонесат за подобри услови за работа и поквалитетни услуги за граѓаните.

Крајната цел е изградба на модерна, професионална, транспарентна и одговорна полиција, која ќе биде поблиску до граѓаните, ќе ја зајакнува нивната доверба и ќе придонесува за повисоко ниво на безбедност.