„Јасно и гласно до СДС и Филипче, вие со Заев што ја распродававте Македонија за личен профит, згради и станови во Дубаи сте во длабока опозиција“, вели ВМРО-ДПМНЕ

ВМРО-ДПМНЕ преку соопштение реагира на денешната прес-конференција на претседателот на СДСМ, Венко Филипче, обвинувајќи го него и СДСМ дека во периодот кога биле на власт ги ставиле личните и партиските интереси пред државните.

Во партиското соопштение се наведува дека Филипче и поранешниот премиер Зоран Заев, според нив, тргувале со националните интереси, идентитетот, историјата и јазикот, а истовремено ја „ограбиле државата“ и ги осиромашиле граѓаните.

— реклама —

Од ВМРО-ДПМНЕ велат дека СДСМ сега се спротивставува и на владините политики за економски развој, особено во делот на рударството и високотехнолошката индустрија.

— реклама —

„Развојот на рударството е една од гранките кои овозможуваат долг и стабилен раст и развој на домашната економија и индустрија, а СДС и Венко Филипче се против“, стои во реакцијата.

Партијата го обвинува СДСМ и за спротивставување на изградбата на центри за податоци, при што наведува дека дел од сегашни и поранешни членови на партијата ја поддржуваат оваа идеја или се вклучуваат во бизнисот со центри за податоци.

— реклама —

Во продолжение на реакцијата, ВМРО-ДПМНЕ упатува низа обвинувања кон Филипче и Заев, меѓу кои и тврдења за лични финансиски интереси, бизниси и тендери.

Од ВМРО-ДПМНЕ велат дека Владата предводена од нивната партија ќе продолжи со политики насочени кон развојот на државата и економијата.

На крајот, партијата му порача на Филипче и на СДСМ дека се наоѓаат во „длабока опозиција“, додавајќи дека граѓаните на следните избори ќе го дадат својот став за нивната политика.