Од Министерството за јавна администрација соопштија дека во Скопје се одржа Четвртата седница на Советот за реформа на јавната администрација, на која беа разгледани и усвоени клучни извештаи поврзани со напредокот на реформските процеси во јавниот сектор.
Со седницата претседаваше премиерот проф. д-р Христијан Мицкоски, а на дневен ред беа Годишниот извештај за 2025 година за спроведување на Стратегијата за реформа на јавната администрација (2023–2030) со Акцискиот план, како и Извештајот за јавната администрација изработен според препораките од оценската мисија на СИГМА за 2024 година, стои во соопштението.
Министерот за јавна администрација Горан Минчев ги презентираше клучните наоди од извештаите, нагласувајќи дека е забележан напредок во повеќе области, вклучително управувањето со човечки ресурси, креирањето политики, дигитализацијата и зголемувањето на транспарентноста, стои во соопштението.
Тој посочи дека за првпат годишниот извештај е подготвен со помош на унапредена ИТ алатка за следење на податоци, што овозможува попрецизен и поефикасен увид во реализацијата на реформските активности, стои во соопштението од Министерството.
„Советот за реформа на јавната администрација има клучна улога во координацијата на реформите и обезбедувањето јасна насоченост кон резултати“, истакна Минчев.
На седницата беа усвоени заклучоци со кои институциите се задолжуваат да продолжат со ревидирање на активностите во Акцискиот план и редовно ажурирање на податоците во системот за следење на имплементацијата на Стратегијата, стои во соопштението.
Министерството за јавна администрација останува посветено на продолжување на реформите, со цел создавање поефикасна, современа и граѓански ориентирана администрација, стои во соопштението.
