Екипите на ЈП „Охридски Комуналец“ продолжуваат со редовните и вонредните активности за одржување на парковите и зеленилото на подрачјето на Охрид, со засилен ангажман поради високите температури.
Поради топлотниот период се спроведува вонредно наводнување на градското зеленило, со цел да се зачуваат зелените површини. Паралелно се уредува и отстранува вегетацијата покрај патниот правец кон село Скребатно и манастирот „Успение на Пресвета Богородица“.
На повеќе локации се интервенира и со отстранување на оштетени и паднати гранки кои настанале како последица на силните ветрови.
Во рамки на тековното одржување на јавното зеленило се косат зелените површини долж улиците „15-ти Корпус“, „Никола Карев“ и „Галичица“, а редовно се врши и шишање и обликување на украсните растенија. Екипите работат и на плевење на цветните леи кај кружната сообраќајница во близина на градскиот пазар, како и на тековно одржување на хортикултурните содржини долж улицата „Македонски Просветители“.
