ЈП „Охридски Комуналец“ упати апел до компаниите и домаќинствата за правилно одлагање на картонската амбалажа, нагласувајќи дека соодветното постапување со овој вид отпад е од големо значење за ефикасното функционирање на системот за селекција и рециклирање.
Од претпријатието посочуваат дека кога картонските кутии се фрлаат без претходно да бидат спакувани или преклопени, контејнерите многу побрзо се исполнуваат, се преполнуваат и отпадот завршува околу нив. Ваквата практика го отежнува собирањето на материјалот за рециклирање и создава дополнителни трошоци поради потребата од вонредно празнење на садовите.
Голем дел од правните субјекти, како и дел од домаќинствата, располагаат со посебни сини или метални контејнери наменети за хартија и картон. Од ЈП „Охридски Комуналец“ апелираат картонската амбалажа да се одлага преклопена и спакувана, со што ќе се овозможи подобро искористување на просторот во контејнерите и поефикасно собирање на отпадот.
Од претпријатието потсетуваат дека правилната селекција на отпадот е заедничка одговорност и ги повикуваат граѓаните и компаниите совесно да придонесуваат кон зачувување на животната средина.
