ЈП „Охридски комуналец“ апелира: Селектирајте го металниот отпад и намалете го загадувањето

ЈП „Охридски комуналец“ упати апел до граѓаните за правилно селектирање на металниот отпад, потсетувајќи дека металот е материјал кој не го губи квалитетот и може да се рециклира неограничен број пати.

— реклама —

Од претпријатието посочуваат дека селектирањето на металниот отпад не само што го намалува испуштањето на штетни материи во природата, туку има и значително влијание врз намалувањето на загадувањето. Според објавените податоци, користењето на рециклирано железо придонесува за намалување на аерозагадувањето за 86 проценти, загадувањето на водата за 76 проценти, додека употребата на вода се намалува за 40 проценти на глобално ниво.

— реклама —

Воедно, предупредуваат дека неселектираните лименки, конзерви и други метални предмети често завршуваат на депонијата Буково, каде што, поради човечки фактор и лица кои трагаат по вреден метален отпад, се зголемува ризикот од појава на пожари.

— реклама —

Од ЈП „Охридски комуналец“ информираат дека граѓаните во Охрид металниот отпад можат да го одложуваат во жолтите канти каде што е започната селекцијата, како и во жолтите контејнери на Пакомак. Притоа, особено е важно металните конзерви, лименки и другите амбалажи да бидат чисти пред да бидат фрлени за рециклирање.

— реклама —

„Отпадот е прашање кое нѐ засега сите. Селектирај правилно!“, порачуваат од јавното претпријатие, повикувајќи на поголема еколошка свест и одговорност кај граѓаните.