Екипите на ЈП „Охридски Комуналец“ од раните утрински часови реализираа акција за машинско и рачно миење на пешачките зони во централното градско подрачје, со цел одржување на јавната хигиена на високо ниво во текот на туристичката сезона.
Во рамките на активностите беше извршено темелно чистење на најфреквентните пешачки површини, а плочникот во охридската чаршија и другите пешачки зони беа третирани со специјално средство за отстранување на тврдокорни наслаги.
Од претпријатието информираат дека ваквите акции се спроведуваат континуирано, со цел одржување на чиста и уредна градска средина за жителите и бројните посетители на Охрид во текот на летната туристичка сезона.
