ЈП „Охридски комуналец“ упати благодарност до граѓаните на Охрид и околните населени места за совесното селектирање и уредното одлагање на текстилниот отпад, истакнувајќи дека интересот и одговорноста на граѓаните придонесуваат кон поуспешно управување со отпадот и заштита на животната средина.
Од претпријатието информираат дека во текот на летниот период контејнерот за одлагање на текстилен отпад ќе биде преместен од паркингот кај Кам Вилиџ на нова локација, во рамките на одделот за механизација на ЈП „Охридски комуналец“.
Промената, како што посочуваат, е направена со цел подобра организација на активностите во текот на сезоната и непречено функционирање на услугата за собирање текстилен отпад.
Воедно, од јавното претпријатие ги повикуваат граѓаните да продолжат со одговорното постапување со текстилниот отпад и да ги следат нивните официјални информации за деталите околу следната акција за негово собирање.
„Следете нѐ за информирање во однос на следната акција за собирање на текстилен отпад“, порачуваат од ЈП „Охридски комуналец“, нагласувајќи дека секој правилно селектиран отпад претставува придонес кон почиста и поздрава животна средина.
