ЈП „Охридски Комуналец“ мапираше девет диви депонии на локации каде нивните екипи континуирано интервенираат поради несовесно одлагање отпад, при што од терен беа подигнати вкупно 48 кубни метри отпад.
Дивите депонии се евидентирани кај станбениот комплекс во Даљан, на улицата „Шар Планина“, во населбите Лескајца и Воска, на улицата „Дејан Војвода“, како и во селото Трпејца.
Од претпријатието посочуваат дека и покрај постојаните активности за подигнување на јавната свест и обезбедувањето услови за правилно одлагање на кабастиот, зелениот и градежниот отпад, сè уште има поединци кои отпадот го депонираат на несоодветни места, со што се создаваат нови диви депонии.
Од ЈП „Охридски Комуналец“ апелираат до граѓаните совесно да постапуваат со отпадот и да придонесат кон зачувување на чиста и здрава животна средина, со надеж дека ваквите појави ќе стануваат сè поретки и дека Охрид ќе остане чист и уреден град.
