ЈП „Охридски комуналец“ упати нов апел до граѓаните за правилно селектирање на PET пластиката, потсетувајќи дека станува збор за најлесно рециклирачката пластика и единствената пластична амбалажа што може целосно да се рециклира.
Од претпријатието посочуваат дека PET амбалажата е лесно препознатлива по своето лого и дека, доколку правилно се селектира, може повторно и повторно да се користи како суровина за производство на нова пластика. Според достапните податоци, рециклирањето на PET амбалажата овозможува намалување на емисиите на јаглерод диоксид во атмосферата за дури 90 проценти во споредба со производството на нова пластика.
Воедно, предупредуваат дека доколку оваа пластика заврши на ѓубриште, ќе бидат потребни меѓу 400 и 1.000 години за нејзино распаѓање. Наместо целосно да се разгради, пластиката се распаѓа на ситни честички – микропластика, која преку почвата и водата лесно навлегува во синџирот на исхрана.
„Во процесот на распаѓање пластиката испушта штетни хемикалии кои можат да бидат токсични по здравјето на луѓето“, предупредуваат од ЈП „Охридски комуналец“.
Од претпријатието информираат дека домаќинствата кои сè уште не се приклучени на мрежата за селекција можат селектираните пластични шишиња и лименки да ги одлагаат во вендинг машините на Пакомак, поставени во Кам Вилиџ.
„Отпадот е прашање коешто нѐ засега сите. Селектирај правилно!“, порачуваат од ЈП „Охридски комуналец“, повикувајќи на поголема еколошка свест и активно учество во процесот на рециклирање.
