Екипите на ЈП „Охридски Комуналец“, задолжени за подигнување кабаст и зелен отпад, секојдневно се ангажирани на терен во обид да се справат со големите количества непрописно одложен отпад на повеќе локации низ Охрид.
Во текот на денешниот ден беше реализирана акција во населбата Даљан, каде што повторно беа расчистени критични точки со диво депониран отпад. Од претпријатието посочуваат дека и покрај редовните интервенции, несовесни граѓани веднаш по расчистувањето повторно оставаат кабаст и зелен отпад, како и остатоци од градежни материјали.
Од ЈП „Охридски Комуналец“ нагласуваат дека ваквото однесување ја загадува животната средина, создава грда слика за градот и остава негативен впечаток кај жителите и туристите. Поради тоа, повторно упатуваат апел отпадот да се одлага на пропишан начин.
Претпријатието редовно ги информира граѓаните за акциите за подигнување кабаст и зелен отпад, а за пријавување на ваков отпад на располагање е и телефонскиот број 075-397-944.
Од „Охридски Комуналец“ истакнуваат дека само со заедничка грижа и соработка може да се зачува чиста и уредна животна средина и Охрид да го задржи својот препознатлив изглед.
