ЈП „Охридски комуналец“ реагира на објава на советник: Косењето се одвива според план и програма

ЈП „Охридски комуналец“ реагираше на објава на социјалните мрежи на советник од политичка партија, оценувајќи дека во јавноста биле пласирани селективни информации во врска со одржувањето на јавните површини во градот.

— реклама —

Од претпријатието посочуваат дека директорот на денешната седница јасно информирал дека работата се одвива согласно однапред утврден план и програма. Според нив, централното градско подрачје досега било косено четири до пет пати, додека активностите во реонот кај касарната започнале уште минатата недела.

— реклама —

„Просторот беше еднаш искосен, а активностите продолжуваат и во текот на овие денови“, наведуваат од ЈП „Охридски комуналец“.

Во реакцијата се истакнува дека, согласно расположливата механизација и ресурси, екипите постојано се на терен и секојдневно работат на одржување на јавната чистота и зеленилото низ Охрид.

— реклама —

Од јавното претпријатие сметаат дека не е коректно излагањата и одговорите дадени на седниците да се пренесуваат селективно и да се користат за дневно-политички цели. Наместо создавање погрешна слика во јавноста, според нив, потребно е објективно информирање и заеднички пристап во решавањето на проблемите.

— реклама —

„Наш приоритет останува интересот на граѓаните и уредувањето на градот Охрид“, порачуваат од ЈП „Охридски комуналец“.