ЈП „Охридски комуналец“ упати апел до граѓаните за поголема одговорност при одлагањето на отпадот, предупредувајќи дека дивите депонии претставуваат сериозна закана за здравјето на луѓето и животната средина, а воедно предизвикуваат и непотребни финансиски трошоци.
Од претпријатието посочуваат дека отпадот кој нелегално се остава на несоодветни локации ја загадува почвата и подземните води, шири токсични материи и создава услови за појава на штетници и болести.
„Дивите депонии не се само грда слика, туку сериозна закана за здравјето на сите нас и животната средина“, предупредуваат од ЈП „Охридски комуналец“.
Воедно, истакнуваат дека службите постојано излегуваат на терен за расчистување на ваквите ѓубришта, при што се трошат значителни ресурси што им припаѓаат на сите граѓани. Според нив, доколку отпадот се одлага на местата и на начин предвиден со прописите, средствата што сега се користат за отстранување диви депонии би можеле да се пренасочат кон обезбедување поквалитетни комунални услуги.
Од јавното претпријатие ги повикуваат граѓаните кои не знаат каде да го одложат одреден вид отпад да побараат информација преку телефонскиот број 075 397 944, со цел да се избегне создавање нови диви депонии.
„Одговорноста за нашето здравје и чистотата на нашето живеалиште зависи од сите нас. Со правилно одлагање на отпадот го штитиме просторот во кој живееме и спречуваме долгорочни последици кои сите ги плаќаме, и денес и во иднина“, порачуваат од ЈП „Охридски комуналец“.
