Јавното претпријатие „Охридски комуналец“ упатува апел до граѓаните да го одлагаат отпадот на пропишаните и дозволени локации, со цел да се спречи создавање на диви депонии и да се заштити животната средина.
Од претпријатието информираат дека граѓаните кои имаат отпад што не знаат каде да го одложат можат да се јават на телефонскиот број 075 397 944, каде ќе добијат информации и насоки за соодветно постапување.
Оттаму посочуваат дека дивите депонии не претставуваат само нарушување на изгледот на околината, туку и сериозна закана за здравјето на населението, бидејќи загадуваат почва и подземни води, шират токсични материи и привлекуваат штетници и болести.
Се нагласува и дека ангажманот на службите за расчистување на ваквите локации повлекува значителни финансиски и човечки ресурси, кои, доколку отпадот се одлага правилно, би можеле да бидат насочени кон подобрување на услугите за граѓаните.
Од „Охридски комуналец“ потенцираат дека одговорноста за чиста и здрава животна средина е заедничка и дека со правилно одлагање на отпадот се штити просторот за живеење и се спречуваат долгорочни последици.
