ЈП „Охридски комуналец“ повторно апелира до граѓаните и правните субјекти кои работат во Стариот град да ги почитуваат препораките за правилно одлагање на комуналниот отпад, со цел одржување на чистотата во најпосетуваниот дел од Охрид.
Од претпријатието потсетуваат дека отпадот треба да се одлага во канти, а не во ќеси, и тоа најдоцна до 6 часот наутро, согласно утврдената динамика за негово подигање.
„Ова се редовни слики од најпосетуваниот дел од Охрид од страна на туристи, место коешто е живеалиште на голем број граѓани и простор во кој функционираат бројни бизниси. Ова не е сликата што сакаме ниту да ја живееме, ниту да ја оставиме како впечаток за нашата култура“, велат од ЈП „Охридски комуналец“.
Оттаму предупредуваат дека отпадот, особено остатоците од храна оставени во ќеси, често завршува расфрлан по улиците поради уличните и домашните животни. Поради тоа, граѓаните и деловните субјекти се повикуваат отпадот да го одлагаат во соодветни канти, со затворени капаци, и да не дозволуваат тој предолго да останува на јавните површини, особено во периодот на високите температури.
Од претпријатието нагласуваат дека отпадот е неизбежен дел од секојдневното живеење и работење и дека неговото правилно управување треба да биде дел од организацијата и одговорноста и во домовите и во деловните објекти.
„Благодариме на разбирањето и на сите напори што ги правите за почиста и поздрава животна средина за сите нас“, порачуваат од ЈП „Охридски комуналец“.
