ЈП „Охридски комуналец“ со апел до жителите и угостителите во Стариот град: Почитувајте го комуналниот ред

ЈП „Охридски комуналец“ ги извести граѓаните и правните субјекти од Урбаната заедница Стар Град да го почитуваат комуналниот ред и пропишаната динамика за подигање на комуналниот отпад, особено во пресрет на туристичката сезона.

— реклама —

Од јавното претпријатие информираат дека, почнувајќи од 29 мај 2026 година, правните субјекти кои вршат дејност во овој дел од Охрид имаат обврска отпадот да го депонираат и да го оставаат за подигнување во пластични канти за отпад најдоцна до 6 часот наутро.

— реклама —

Доколку отпадот биде оставен надвор од пропишаниот термин или биде несоодветно депониран, согласно законските одредби ќе постапува Комуналниот инспекторат, при што ќе бидат изрекувани соодветни санкции.

Воедно, од ЈП „Охридски комуналец“ апелираат и до граѓаните комуналниот отпад уредно да го спакуваат и да го одлагаат на местата определени за таа намена или во кантите за отпад, во точно утврдените денови за конкретниот реон, најдоцна до 6 часот наутро.

— реклама —

Посебен апел е упатен и до сопствениците на викенд-станови и приватните станоиздавачи, кои треба да ги информираат своите гости за правилата за одлагање на отпадот и почитување на комуналниот ред.

— реклама —

Од јавното претпријатие изразуваат надеж за взаемна соработка и разбирање од страна на граѓаните и деловните субјекти, со цел одржување на чист и уреден Охрид во текот на туристичката сезона.