Љубителот на автомобили и јутјубер Енди Слај откри колку брзо може да падне вредноста на автомобилите на Тесла, откако за само пет месеци изгубил 12.200 долари на својот автомобил.
Тој купил Tesla Model 3 од 2023 година за околу 46.000 долари, а само неколку месеци подоцна го продал за 33.800 долари. Според него, некои понуди биле и значително пониски.
Слај открил дека и претходните модели што ги поседувал изгубиле голем дел од вредноста. Неговиот Tesla Model 3 Long Range од 2018 година, кој го платил 56.000 долари, по седум години го продал за само 19.000 долари.
Слична ситуација има и со Tesla Model Y од 2022 година, чија моментална вредност е помала од половина од цената по која бил купен.
Експертите објаснуваат дека електричните автомобили побрзо ја губат вредноста бидејќи технологијата на батериите брзо напредува, па постарите модели за кратко време изгледаат застарено.
Слај посочува дека честите промени на цените и новите надградби што ги воведува Tesla дополнително влијаат врз пазарот на половни возила.
„Tesla особено страда од висока амортизација. Цените на половните Tesla автомобили во првата година можат да паднат и до 25 проценти“, изјавил тој.
На крајот заклучил дека луѓето што размислуваат за Tesla можеби подобро би поминале ако купат половен, наместо целосно нов модел.
