Како до стабилни јавни финансии и поголем економски раст? Димитриеска-Кочоска на средби со ММФ и Светска банка

Одговорното управување со јавните финансии, рационалното трошење на буџетските средства и спроведувањето структурни реформи се меѓу клучните услови за одржлив економски развој во време на зголемена глобална неизвесност. Овие прашања беа во центарот на дискусиите на годишните средби на Меѓународниот монетарен фонд (ММФ) и Светската банка во Бангкок, на кои учествуваше министерката за финансии Гордана Димитриеска-Кочоска.

На пленарната сесија беше истакнато дека светската економија, и покрај бројните предизвици, покажува отпорност, но зачестените економски потреси го ограничуваат просторот за фискални интервенции. Инфлацијата и натаму претставува сериозен проблем за повеќе земји, поради што е неопходно внимателно спроведување на макроекономските политики.

— реклама —

Димитриеска-Кочоска нагласи дека одговорното управување со државните финансии останува еден од главните приоритети на економската политика, особено во услови на неизвесни глобални движења.

Според неа, економските активности се насочени кон постепена фискална консолидација, поефикасно користење на јавните средства и спроведување реформи што ќе придонесат за зголемување на продуктивноста и конкурентноста на домашната економија. Меѓу приоритетите се и создавањето поволни услови за нови инвестиции и обезбедувањето долгорочен економски раст од кој придобивки ќе имаат граѓаните и бизнис-секторот.

— реклама —

На завршната пленарна сесија се обратија генералната директорка на ММФ, Кристалина Георгиева, претседателот на Групацијата на Светската банка, Аџај Банга, и претседателот на годишните средби и гувернер на Централната банка на Парагвај, Карлос Карваљо Спалдинг.

За време на престојот во Бангкок, министерката за финансии одржа и низа билатерални средби со високи претставници на меѓународните финансиски институции.

На разговорите со регионалната потпретседателка на Светската банка за Европа и Централна Азија, Антонела Басани, потпретседателот на Меѓународната финансиска корпорација (ИФЦ), Алфонсо Гарсија Мора, и извршниот директор на Светската банка, Јуџин Ругенат, биле разгледани можностите за продолжување на реформите, реализација на стратешки инвестиции и поголемо вклучување на приватниот сектор во економскиот развој.

— реклама —

На агендата биле и средбите со заменик-генералниот директор на ММФ, Бо Ли, директорот на Фондот за Европа, Матеуш Шчурек, како и со претставниците Јерун Клик и Марникс ван Рај.

Во разговорите посебно внимание било посветено на среднорочните планови за фискална консолидација, одржувањето на буџетската дисциплина и реформите за зајакнување на отпорноста на јавните финансии. Биле разгледани и можностите за поттикнување на инвестициите и зголемување на економската активност.

Годишните средби на ММФ и Светската банка се платформа за размена на мислења меѓу носителите на економските политики и претставниците на меѓународните финансиски институции. Нивното значење е особено големо во услови кога глобалните економски движења директно влијаат врз националните економии.

Главната порака од средбите во Бангкок е дека одржливите јавни финансии, континуираните структурни реформи и внимателното управување со ризиците се неопходни за долгорочна економска стабилност и поголема конкурентност.